ညစ်ညမ်းမှုတွေ ပြည့်နှက်နေတဲ့ ကမ္ဘာကြီးမှာ နေထိုင်နေရတာက စိန်ခေါ်မှုတစ်ရပ်ကို ရင်ဆိုင်နေရတာပါပဲ။ မီးခိုးမြူတွေကစလို့ အိမ်တွင်းမှာ အသုံးပြုတဲ့ ပစ္စည်းတွေကနေ ထွက်ရှိလာတဲ့ သာမန်မျက်စိနဲ့ မမြင်ရတဲ့ အမှုန်တွေ၊ အဆိပ်အတောက်တွေက ကိုယ်တွင်းထဲကို နည်းလမ်းအမျိုးမျိုးနဲ့ ဝင်ရောက်နေကြပါတယ်။ ရှောင်လွှဲလို့မရတဲ့ ဒီအခြေအနေတွေအတွက် ကိုယ်တွင်းမှာ ညစ်ညမ်းမှုတွေနဲ့ အဆိပ်အတောက်တွေကြောင့် ထိခိုက်မှု ကင်းစေဖို့ နေ့စဉ်မှာ လိုက်နာလုပ်ဆောင်သင့်တဲ့ အလေ့အထလေးတွေ ရှိနေပါတယ်။ ဒီအလေ့အထလေးတွေက ကိုယ်တွင်းအဆိပ်အတောက်တွေကို ဖြေလျော့ပေးသလို ညစ်ညမ်းမှုကြောင့် ကျန်းမာရေးထိခိုက်နိုင်ခြေကိုလည်း အတိုင်းအတာ တစ်ခုအထိလျော့ချပေးနိုင်မှာပါ။

ညစ်ညမ်းမှုကြောင့် ဘယ်လို ထိခိုက်စေမလဲ!

၂၀၂၀ ခုနှစ်က ပြုလုပ်ခဲ့တဲ့ လေ့လာမှုတွေအရ လေထုညစ်ညမ်းမှုက ကျန်းမာရေးအပေါ် တော်တော်လေး သက်ရောက်မှု ရှိတာကို တွေ့ရှိခဲ့ရပါတယ်။ လေထုညစ်ညမ်းမှုက ကာလတို အနေနဲ့ဆိုရင် နာတာရှည် အဆုတ်လေပြံန်ရောင်ရမ်းတာ၊ ချောင်းဆိုးတာ၊ လည်ချောင်းနာတာ၊ အသက်ရှူရ ပြတ်တောင်းတောင်း ဖြစ်တာ၊ အသက်ရှူရင် တရွှီရွှီမြည်တာ၊ ပန်းနာရင်ကျပ်၊ အသက်ရှူလမ်းကြောင်း ပိုးဝင်ကူးစက်တာမျိုးတွေကို ဖြစ်စေနိုင်ပါတယ်။ ရေရှည်ထိတွေ့မယ်ဆိုရင် နာတာရှည် ပန်းနာရင်ကျပ်၊ အဆုတ်စွမ်းဆောင်ရည် ကျဆင်းတာ၊ နှလုံးသွေးကြောဆိုင်ရာ ရောဂါတွေနဲ့ နာတာရှည် ကျန်းမာရေးပြဿနာ ရှိသူတွေ၊ ကိုယ်ဝန်ဆောင်မိခင်တွေနဲ့ ကလေးငယ်တွေမှာလည်း ကျန်းမာရေးထိခိုက်တာတွေကို ဖြစ်စေနိုင်ပါတယ်။

ညစ်ညမ်းမှုတွေ များလာတဲ့ကြားမှာ ထိခိုက်မှု ကင်းစေဖို့

နေ့စဉ် ထိတွေ့နေရတဲ့ ညစ်ညမ်းမှုတွေကြောင့် ခန္ဓာကိုယ်မှာ အဆိပ်အတောက်တွေ ဖြစ်တာကို ဖယ်ရှားပြီး ကိုယ်ခံအား ထိခိုက်မှု ကင်းစေဖို့ဆိုရင် - အာဟာရပြည့်ဝမျှတအောင် စားသုံးပါ ကိုယ်တွင်းက အဆိပ်အတောက်တွေကို ထိထိရောက်ရောက် ဖယ်ရှားဖို့ဆိုရင် နေ့စဉ် စားသုံးတဲ့ အစားအစာတွေထဲမှာ ဓာတ်တိုးဆန့်ကျင်ပစ္စည်း ကြွယ်ဝစွာ ပါဝင်တဲ့ အစားအစာတွေကို စားမိဖို့ လိုပါမယ်။ ဒါမှ ညစ်ညမ်းမှုမှာ ပါလာတဲ့ ဓာတ်တိုးပစ္စည်းတွေကြောင့် ထိခိုက်မှု ကင်းစေမှာပါ။ ဒါကြောင့် နေ့စဉ် စားသုံးမှုမှာ ဒါလေးတွေ ပါဝင်အောင် စားသုံးပေးပါ။

အစိမ်းရောင်ဟင်းသီးဟင်းရွက်တွေ - သွေးကြောထုက အဆိပ်အတောက်တွေကို ဖယ်ရှားပေးမယ့် ဟင်းနုနွယ်၊ ကိုက်လန်၊ မုန်ညှင်းစိမ်းတို့လိုမျိုး ကလိုရိုဖီးလ် ပါဝင်နေတဲ့ အစိမ်းရောင်ဟင်းသီးဟင်းရွက်တွေ
ဂေါ်ဖီမျိုးရင်းဝင် အသီးအရွက်တွေ - အသည်းက အဆိပ်အတော်ကတွေကို ဖယ်ရှားပေးမယ့် ပန်းဂေါ်ဖီ၊ ပန်းဂေါ်ဖီစိမ်း၊ ဂေါ်ဖီထုပ်တို့လိုမျိုး ဂေါ်ဖီမျိုးရင်းဝင် အသီးအရွက်တွေ
ဗီတာမင် C ကြွယ်ဝတဲ့ အသီးအနှံတွေ - ကိုယ်ခံအားကို အားဖြည့်ပေးနိုင်မယ့် ဓာတ်တိုးဆန့်ကျင်ပစ္စည်းတွေ ပါဝင်နေတဲ့ အချဉ်ဓာတ်ပါတဲ့ အသီးတွေ၊ ငရုတ်ပွ၊ စတော်ဘယ်ရီတို့လိုမျိုး အသီးအနှံတွေကို စားပေးလို့ ရပါတယ်။
အမျှင်ဓာတ်ကြွယ်ဝတဲ့ အစားအစာတွေ - အမျှင်ဓာတ်က အစာခြေစနစ်ထဲက အဆိပ်အတောက်တွေကို ဖယ်ရှားပေးနိုင်ပါတယ်။ ဒါကြောင့် နေ့စဉ်စားသုံးမှုမှာ နှံစားသီးနှံတွေ၊ ပဲအမျိုးမျိုး၊ သစ်သီးတွေ၊ ဟင်းသီးဟင်းရွက်တွေကို စားပေးပါ။

ရေဓာတ်ပြည့်ဝအောင် နေပါ ရေက ကိုယ်တွင်းက အဆိပ်အတောက်တွေကို ဖယ်ရှားပေးပြီး ကျန်းမာစေဖို့ အထိရောက်ဆုံးနဲ့ အလွယ်ကူဆုံးနည်းလမ်းပါ။ ရေလုံလော်ကမှုက ကျောက်ကပ်က သွေးထဲမှာရှိတဲ့ ညစ်ညမ်းမှုတွေကို ဖယ်ရှားရာမှာ လွယ်ကူစေသလို ခန္ဓာကိုယ်မှာ အင်အားပြည့်စေဖို့ပါ ထောက်ကူပေးနိုင်မှာပါ။ တစ်နေ့ကို အနည်းဆုံး ရေ ၈ ခွက် ကနေ ၁၀ ခွက်လောက်အထိ သောက်ပေးပါ။ ရေနွေးနွေးထဲကို သံပုရာသီး တစ်စိတ်လောက်ထည့်ပြီး သောက်ပေးတာက နည်းလမ်းကောင်းပါ။ မနက်ခင်းတိုင်း သံပုရာရေနွေးကြမ်းလေး သောက်ပေးတာက အသည်းလုပ်ဆောင်မှု ကောင်းစေဖို့ရော အစာကြေစေဖို့ပါ ထောက်ကူပေးမှာပါ။ ချင်း(ဂျင်း) ရေနွေးကြမ်း၊ လက်ဖက်စိမ်းရေနွေးကြမ်းတွေက ခန္ဓာကိုယ်ကို ရေဓာတ်ဖြည့်ပေးသလို ကိုယ်တွင်း အဆိပ်အတောက်တွေကို ဖယ်ရှားဖို့လည်း ထောက်ကူပေးပါတယ်။ ပါဝင်နေတဲ့ ဓာတ်တိုးဆန့်ကျင်ပစ္စည်းတွေ ကလည်း ခန္ဓာကိုယ်ကို ဓာတ်တိုးပစ္စည်းတွေကြောင့် ထိခိုက်နိုင်ခြေကို လျှော့ချပေးပါတယ်။ အိပ်ရေးဝဝအိပ်ပါ အိပ်ရေးဝတာက စိတ်ရောကိုယ်ပါ ကျန်းမာစေဖို့ ကိုယ်တွင်းအဆိပ်အတောက်ကင်းစေဖို့ အထိရောက်ဆုံး ထောက်ကူပေးနိုင်မယ့် အရာပါ။ အိပ်ချိန်အတွင်းမှာ ခန္ဓာကိုယ်က ပြင်ဆင်မှုတွေ လုပ်ပေးသလို ကိုယ်တွင်းက အဆိပ်အတောက်တွေကိုလည်း ဖယ်ရှားပေးနေပါတယ်။ ပြည့်ဝတဲ့ အိပ်စက်ချိန်က ကိုယ်တွင်းနဲ့ ဦးနှောက်ထဲက အဆိပ်အတောက်တွေကို ဖယ်ရှားပေးပါတယ်။ ညတိုင်းကို အိပ်ချိန်မှန်မှန်အိပ်ပြီး အိပ်စက်ချိန်ကို ၇ နာရီက နေ ၉ နာရီ ရအောင် အိပ်ပေးဖို့ လိုပါမယ်။ ကိုယ်လက်လှုပ်ရှားမှု ပုံမှန် လုပ်ပါ ခန္ဓာကိုယ်ထဲက အဆိပ်အတောက်တွေကို ဖယ်ရှားနိုင်အောင် အထောက်အပံ့ပေးမယ့် နောက်ထပ်နည်းလမ်း တစ်ခုကတော့ နေ့စဉ်မှန်မှန် ကိုယ်လက်လှုပ်ရှားမှု ပုံမှန် လုပ်တာပါ။ ဒီလို လုပ်တာက ကိုယ်တွင်းက ဆဲလ်တွေအတွက် အရေးပါတဲ့ အာဟာရဓာတ်တွေနဲ့ အောက်ဆီဂျင်တွေကို ထိထိရောက်ရောက် ရရှိစေဖို့ နည်းလမ်းကောင်းတစ်ရပ်ဖြစ်သလို အဆိပ်အတောက်တွေကိုလည်း ဖယ်ရှားပေးနိုင်မှာပါ။ လေ့ကျင့်ခန်း လုပ်ချိန်မှာ ချွေးထွက်သွားတာက အရေပြားက အညစ်အကြေးတွေကို ထိထိရောက်ရောက် ဖယ်ရှားနိုင်ပါတယ်။ အသက်ရှူလေ့ကျင့်ခန်း လုပ်ပါ ပတ်ဝန်းကျင် လေထုညစ်ညမ်းမှုကို မထိန်းချုပ်နိုင်ပေမယ့် အိမ်တွင်းလေထု သန့်စင်စေဖို့တော့ လုပ်လို့ ရပါတယ်။ အိမ်ထဲမှာ လေသန့်စင်စက်လေး ဖွင့်ထားတာ၊ ရှားစောင်းလက်ပပ်ပင်၊ snake plant တို့လိုမျိုး လေထုသန့်စင်ပေးတဲ့ အပင်တွေကို စိုက်ထားပြီး အသက်ရှူလေ့ကျင့်ခန်းလေး လုပ်ပေးပါ။ ဒီလို လုပ်ပေးတာက အဆိပ်အတောက်တွေကို ဖယ်ရှားပေးပြီး စိတ်ဖိစီးမှုပြေလျော့စေဖို့ရော ကိုယ်ခံအားကောင်းစေဖို့ပါ ထောက်ကူပေးနိုင်မှာပါ။ ဆေးဖက်ဝင်ပစ္စည်းတွေရဲ့ အကူအညီ ရယူပါ အချို့သော ဆေးဖက်ဝင်ပစ္စည်းတွေက ခန္ဓာကိုယ်ရဲ့ ဇီဝကမ္မစနစ်ကောင်းမွန်စေဖို့နဲ့ ကိုယ်တွင်းမှာ အဆိပ်အတောက်ကင်းစေဖို့ ထောက်ကူပေးနိုင်ပါတယ်။ ဒါကြောင့် ကိုယ်တွင်းအဆိပ်အတောက်တွေကို ဖယ်ရှားနိုင်ဖို့အတွက် နေ့စဉ် စားသုံးမှုမှာ

အသည်းဆဲလ်တွေကို ကျန်းမာစေဖို့နဲ့ အသည်းစွမ်းဆောင်ရည် ကောင်းစေဖို့ Milk Thistle
အရောင်ကျစေဖို့၊ အသည်းကျန်းမာစေဖို့နဲ့ ကိုယ်ခံအားကောင်းစေဖို့ ထောက်ကူပေးနိုင်တဲ့ curcumin ပါဝင်နေတဲ့ နနွင်း
ကိုယ်ခံအားအတွက် လိုအပ်မယ့် အာဟာရတွေ ပြည့်ဝစေဖို့နဲ့ အစာအိမ်အူလမ်းကြောင်း ကျန်းမာစေဖို့ ထောက်ကူပေးနိုင်မယ့် အကျိုးပြုဘက်တီးရီးယားပါဝင်နေတဲ့ ဖြည့်စွက်အာဟာရတွေ စားသုံးပေးဖို့လည်း လိုပါမယ်။

နေ့စဉ်မှာ ဒီအချက်လေးတွေကို လိုက်နာပေးမယ်ဆိုရင် လေထုညစ်ညမ်းမှု အပါအဝင် အမျိုးမျိုးသော ညစ်ညမ်းမှုတွေကြောင့် နေ့စဉ်ဘဝမှာ ထိခိုက်မှုမရှိဘဲ စိတ်ရောကိုယ်ပါ ကျန်းမာစေနိုင်မှာပါ။

Lotoshin ရဲ့ စကားလက်ဆောင် လေထုညစ်ညမ်းမှုနဲ့ အမျိုးမျိုးသော ညစ်ညမ်းမှုတွေကို ထိတွေ့မှုကနေ လျှော့ချနိုင်ဖို့နဲ့ အမြဲရှောင်နေဖို့က မလွယ်တာကြောင့် ညစ်ညမ်းမှုတွေကြောင့် ထိခိုက်နိုင်ခြေကို လျှော့ချဖို့အတွက် အာဟာရပြည့်ဝမျှတအောင် စားသုံးတာ၊ ရေလုံလောက်အောင် သောက်သုံးတာ၊ အိပ်ရေးဝဝအိပ်တာ၊ ကိုယ်လက်လှုပ်ရှားမှု လုပ်တာ၊ အပြင်ထွက်တဲ့အခါ မတ်ခ်တပ်တာ၊ အပြင်က ပြန်လာတိုင်းမှာ လက်ဆေးတာ၊ အဝတ်အစားတွေ လဲလှယ်တာမျိုး လုပ်ပြီး ကိုယ်တိုင်နဲ့ မိသားစုဝင်တွေကို ညစ်ညမ်းမှုတွေကြောင့် ထိခိုက်နိုင်ခြေကို လျှော့ချ လို့ ရပါတယ်။ အိမ်တွင်းမှာလည်း အသုံးပြုတဲ့ သန့်ရှင်းရေးသုံးပစ္စည်းတွေကို ဓာတုပစ္စည်း ပါဝင်မှု နည်းတာတွေကို ရွေးချယ်မိဖို့ လိုပါမယ်။

# Disclaimer: ယခုဆောင်းပါးတွင် ပါဝင်သည့် အကြောင်းအရာများမှာ ဗဟုသုတမျှဝေဖို့အတွက်သာဖြစ်ပြီး ဆေးဘက်ဆိုင်ရာကျွမ်းကျင်သူတွေရဲ့ ကုသစစ်ဆေးမှုတွေအစား အစားထိုးအသုံးပြုရန် မဟုတ်ပါ။ ကျန်းမာရေးပြဿနာ တစ်ခုခု ရှိမယ်ဆိုရင် သင့်တော်တဲ့ စစ်ဆေးကုသမှုခံယူဖို့ အကြံပြုချင်ပါတယ်။

ညစ်ညမ်းမှုတွေ များလာတဲ့ကြားမှာ ထိခိုက်မှု ကင်းစေဖို့

ညစ်ညမ်းမှုကြောင့် ဘယ်လို ထိခိုက်စေမလဲ!

ညစ်ညမ်းမှုတွေ များလာတဲ့ကြားမှာ ထိခိုက်မှု ကင်းစေဖို့

Admin

မှတ်ချက်များ (0)