အိပ်ရေးပျက်တာထက် ပိုနေနိုင်တဲ့ မျက်ကွင်းညိုခြင်း

တစ်ယောက်ယောက်ကို တွေ့လိုက်ချိန်မှာ မျက်ကွင်းညိုနေမယ်ဆိုရင် ရုတ်တရက်မေးမိနိုင်တာက အိပ်ရေးပျက်လို့လား ဆိုတာဟုတ် … မျက်ကွင်းညိုတာက အိပ်ရေးပျက်တာကြောင့် ဖြစ်နိုင်သလို တစ်ခါလေမှာ အိပ်ရေးပျက်တာထက် ပိုနေနိုင်တဲ့ ကျန်းမာရေးပြဿနာတွေကြောင့်လည်း ဖြစ်နေနိုင်တာမို့ သိရှိနိုင်အောင် ဖော်ပြပေးလိုက်ပါတယ်။

ဘာကြောင့် မျက်ကွင်းညိုရတာလဲ!

မျက်ကွင်းညိုတယ်ဆိုတာက မျက်လုံးတဝိုက် အသားအရေက အညိုရောင်ဖြစ်နေတာပါ။ မျက်ကွင်းညိုစေတဲ့ အကြောင်းအရင်းတွေကတော့ အများကြီး ရှိနိုင်ပါတယ်။ အတွေ့ရများတဲ့ အကြောင်းအရင်းကတော့ - 

• မျက်လုံးတဝိုက်က သွေးကြောတွေ ကျယ်လာတာ

မျက်လုံးတဝိုက်က သွေးကြောလေးတွေ ကျယ်လာတာကြောင့်လည်း မျက်ကွင်းညိုတာကို ခံစားရနိုင်ပါတယ်။

• အိပ်ရေးပျက်တာ

ပုံမှန်ထက် အိပ်ရေးပျက်တာများမယ်ဆိုရင်လည်း မျက်ကွင်းညိုတာကို ခံစားရနိုင်ပါတယ်။ 

• မျိုးရိုးလိုက်တာ

မျိုးရိုးလိုက်တာကြောင့်လည်း မျက်ကွင်းညိုတာကို ခံစားရတာမျိုး ရှိနိုင်ပါတယ်။ 

• နေရောင်ကြောင့် အရေပြားထိခိုက်တာ

နေရောင်နဲ့ ထိတွေ့မှု များတာကြောင့် အရေပြားထိခိုက်ပျက်စီးတာမျိုးကြောင့်လည်း မျက်ကွင်းညိုတာကို ခံစားရနိုင်ပါတယ်။ 

• အရေပြား ပါးတာ 

အရေပြားက ပုံမှန်ထက် ပါးတာမျိုးဖြစ်မယ်ဆိုရင်လည်း မျက်ကွင်းညိုတာကို ခံစားရနိုင်ပါတယ်။

• Screen Time များလွန်းတာ

ဖုန်းတွေ၊ ကွန်ပျူတာတွေကို အသုံးပြုချိန် အရမ်းများနေတဲ့ အခါမျိုး၊ အိပ်ချိန်နဲ့ကပ်ပြီး Screen Time အများကြီး ရှိနေတာမျိုးဆိုရင်လည်း မျက်ကွင်းညိုတာကို ခံစားရနိုင်ပါတယ်။

• နှာခေါင်းပိတ်တာ 

နှာခေါင်းပိတ်တာ၊ အသက်ရှူရခက်တာမျိုး ခံစားနေရမယ်ဆိုရင်လည်း မျက်ကွင်းညိုတာကို လက္ခဏာတစ်ခုအနေနဲ့ ခံစားရနိုင်ပါတယ်။ 

• နာတာရှည် ဓာတ်မတည့်မှု ခံစားနေရတာ

နာတာရှည် ဓာတ်မတည့်တာကို ခံစားနေရမယ်ဆိုရင်လည်း အကျိုးဆက်အနေနဲ့ မျက်ကွင်းညိုတာကို ခံစားရနိုင်ပါတယ်။ 

• ရေဓာတ်ခမ်းခြောက်တာ

ခန္ဓာကိုယ်မှာ ရေဓာတ်လုံလောက်စွာ မရရှိတာ၊ ရေလုံလောက်အောင် မသောက်မိတာ၊ ကဖင်းနဲ့ အယ်လ်ကိုဟောတွေ အသောက်များတာကြောင့်လည်း ကိုယ်တွင်းမှာ ရေဓာတ်ခမ်းခြောက်မှု ဖြစ်ပြီး မျက်ကွင်းညိုတာကို ခံစားရနိုင်ပါတယ်။

• အသက်အရွယ်ကြီးရင့်လာတာ

အသက်အရွယ်ရလာတာကြောင့်လည်း မျက်ကွင်းညိုတာကို ခံစားရနိုင်ပါတယ်။

• ဗီတာမင် ချို့တဲ့တာ

သံဓာတ်၊ ဗီတာမင် B12 နဲ့ ဗီတာမင် K ချို့တဲ့မယ်ဆိုရင်လည်း သွေးထဲမှာ အောက်ဆီဂျင်စီးဆင်းမှု လျော့နည်းပြီး မျက်ကွင်းညိုတာကို ခံစားရနိုင်ပါတယ်။ 

• ဦးနှောက်မှာ ထိခိုက်မိထားတာ

ဦးခေါင်းကို ပြင်းထန်စွာ ထိခိုက်မိတာကြောင့် ဦးနှောက်တွင်း သွေးယိုစီးတာလိုမျိုး ပြင်းထန်တဲ့ ကျန်းမာရေး အခြေအနေ တစ်ရပ်ရပ်ကို ခံစားရချိန်မှာလည်း မျက်ကွင်းညိုတာကို ခံစားရနိုင်ပါတယ်။ 

• တစ်ရှူးတွေထဲမှာ ပုံမှန်မဟုတ်တဲ့ ပရိုတင်းစုနေတာ

ဖြစ်ခဲတဲ့ အခြေအနေ တစ်ရပ်ဆိုပေမယ့် တစ်ရှူးတွေထဲမှာ ပုံမှန်မဟုတ်တဲ့ အခြေအနေတစ်ရပ်ကြောင့်လည်း သွေးကြောတွေ လျော့ရဲလာပြီး မျက်ကွင်းညိုတာကို ခံစားရနိုင်ပါတယ်။ 

• ကင်ဆာရောဂါတွေ

အချို့သော ကင်ဆာရောဂါတွေကြောင့်လည်း မျက်ကွင်းညိုတာကို ခံစားရနိုင်ပါတယ်။ 

Lotoshinn ရဲ့ စကားလက်ဆောင်

မျက်ကွင်းညိုတာက အိပ်ရေးပျက်တာကြောင့် အဖြစ်များတယ်ဆိုပေမယ့် မျိုးရိုးလိုက်တာ၊ Screen Time များတာ၊ ရေဓာတ်မလုံလောက်တာလိုမျိုး နေ့စဉ်အလေ့အထတွေကြောင့်လည်း ဖြစ်နိုင်ပါတယ်။ တစ်ခါတလေမှာလည်း ပြင်းထန်တဲ့ ကျန်းမာရေးပြဿနာတွေရဲ့  အချက်ပြလက္ခဏာတွေ ဖြစ်နေနိုင်တာကြောင့် ခပ်ပေါ့ပေါ့ မတွေးဘဲ သေချာလေး ဂရုစိုက်ကြဖို့ တိုက်တွန်းလိုက်ပါရစေ။